കേരള സംസ്ഥാന പൈതൃക സംരക്ഷണ നയ രൂപീകരണത്തിനായുള്ള ശുപാർശകൾ

പൈതൃക സമ്പത്ത് ലോകമെങ്ങും കടുത്ത വെല്ലുവിളി നേരിടുകയാണ്.

ഈ വിഷയം രാജ്യാന്തര തലത്തിൽ തന്നെ ചർച്ചയായതിൻ്റെ തുടർച്ചയാണ് യുനസ്കോ പോലെയുള്ള രാജ്യാന്തര സംഘടനകളുടെ രൂപവൽക്കരണം.

പൈതൃക സംരക്ഷണം ഭരണകൂടത്തിൻ്റെയും പൗര സമൂഹത്തിൻ്റെയും ഉത്തരവാദിത്തമാണെന്ന് ഇന്ത്യൻ ഭരണഘടനയും വ്യക്തമാക്കിയിട്ടുണ്ട്.

അതിൻ്റെ പശ്ചാത്തലത്തിലാണ് ഇതുമായി ബന്ധപ്പെട്ട ശക്തമായ നിയമങ്ങൾ.

ആർക്കിയോളജിക്കൽ സർവേ ഓഫ് ഇന്ത്യ (എഎസ്ഐ), മോണ്യുമെൻ്റൽ അതോറിറ്റി ഓഫ് ഇന്ത്യ, തുടങ്ങിയ സ്ഥാപനങ്ങൾ അതിൻ്റെ തുടർച്ചയാണ്.

കേരളത്തിലും പുരാവസ്തു – പുരാരേഖാ വകുപ്പുകളുടെ രൂപവൽക്കരണവും അനുബന്ധ നിയമങ്ങളും ഉണ്ടായി.

ഇത്രയൊക്കെ ഉണ്ടായിട്ടും പൈതൃക സംരക്ഷണം ഫലപ്രദമല്ല.

പൈതൃക സമ്പത്തിനെക്കുറിച്ച് ആർക്കിയോളജിക്കൽ സർവേ ഓഫ് ഇന്ത്യക്കു പോലും കൃത്യമായ കണക്കില്ല.

അതിൻ്റെ സംരക്ഷണ പട്ടികയിലുള്ള പലതിൻ്റെയും സംരക്ഷണം ഫലപ്രദമല്ല.

സാമ്പത്തികവും മനുഷ്യ വിഭവശേഷിയുമൊക്കെയാണ് വെല്ലുവിളി.

കേരളത്തിൽ സ്പർശ്യവും (Tangible), അസ്പർശ്യവും (Intangible) ആയ പൈതൃകങ്ങളുടെ കൃത്യമായ കണക്കില്ല.

എന്താണ് പൈതൃകം എന്നും എങ്ങനെ സംരക്ഷിക്കണമെന്നും അക്കാദമിക സമൂഹത്തിനോ പൊതു സമൂഹത്തിനോ വ്യക്തമല്ല.

പൈതൃക സാക്ഷരതയുടെ അനിവാര്യതയാണ് ഇതൊക്കെ വ്യക്തമാക്കുന്നത്.

ഈ സാഹചര്യത്തിലാണ് പൈതൃക അവബോധം ലക്ഷ്യമിട്ട് പ്രവർത്തിക്കുന്ന സന്നദ്ധ സംഘടനയായ തണൽക്കൂട്ടം സൊസൈറ്റി ഫോർ കൾചറൽ ഹെറിറ്റേജ് ഈ നൂറ്റാണ്ടിന് 25 വർഷം തികയുന്ന 2025 ജനുവരി 18, 19 തീയതികളിൽ തിരുവനന്തപുരം മിത്രാ നികേതൻ സിറ്റി സെൻ്ററിൽ വച്ച് (തഞ്ചാവൂർ അമ്മ വീട്) കേരളത്തിലെ ആദ്യത്തെ പൈതൃക കോൺഗ്രസ് വിളിച്ചു ചേർത്തത്.

ഈ മേഖലയിൽ പ്രവർത്തിക്കുന്ന വിദഗ്ധരെ രണ്ടു ദിവസം ഒന്നിച്ചിരുന്ന് നടത്തിയ വിശദമായ സംവാദം കേരളത്തിന് സമഗ്രമായ ഒരു പൈതൃക നയം രൂപീകരിക്കണമെന്ന നിഗമനത്തിലാണ് എത്തിച്ചേർന്നത്.

ദേശീയ തലത്തിലെയും കേരളത്തിലെയും പൈതൃക സംരക്ഷണം സംബന്ധിച്ച സാമൂഹിക അവലോകനവും നടത്തി.

പൈതൃക കോൺഗ്രസിൽ ഉരുത്തിരിഞ്ഞ നിർദേശങ്ങൾ ശുപാർശയായി ബഹുമാനപ്പെട്ട സംസ്ഥാന സർക്കാരിനു മുന്നിൽ സമർപ്പിക്കുകയാണ്.

ഇത് ഗൗരവമായി പരിഗണിക്കണമെന്ന് അപേക്ഷിക്കുന്നു.

ബഹുമാനപ്പെട്ട മുഖ്യമന്ത്രി മുൻപാകെ തണൽക്കൂട്ടം കൾചറൽ സൊസൈറ്റി ഫോർ ഹെറിറ്റേജ് എന്ന സംഘടന സമർപ്പിക്കുന്ന നിവേദനം
കേരള സംസ്ഥാന പൈതൃക സംരക്ഷണ നയ രൂപീകരണത്തിനായുള്ള ശുപാർശകൾ

പൈതൃക സംരക്ഷണ രംഗത്ത് പ്രവർത്തിക്കുന്ന തണൽക്കൂട്ടം – സൊസൈറ്റി ഫോർ കൾചറൽ ഹെറിറ്റേജ് എന്ന സന്നദ്ധ സംഘടനയുടെ നേതൃത്വത്തിൽ, ഒന്നാം പൈതൃക കോൺഗ്രസ് 2025 ജനുവരി 18, 19 തീയതികളിൽ തിരുവനന്തപുരം മിത്രാനികേതൻ സിറ്റി സെന്ററിൽ ചേർന്ന പരിപാടിയിൽ പങ്കെടുത്ത വിദഗ്ധർ ആവിഷ്ക്കരിച്ച ശുപാർശകളും വിലയിരുത്തലുകളും, സർക്കാർ പരിഗണനയ്ക്കായി അവതരിപ്പിക്കപ്പെടുന്നു.

പശ്ചാത്തല നിരീക്ഷണങ്ങൾ

ഭാരതത്തിലെ ഭരണഘടനാ നിർദ്ദേശങ്ങൾ

ആർട്ടിക്കിള്‍ 51A(f):

പൗരന്മാരുടെ മൗലിക ഉത്തരവാദിത്വമായി പൈതൃക സംരക്ഷണം.

ആർട്ടിക്കിള്‍ 49:

സര്‍ക്കാരിന്റെ ഉത്തരവാദിത്വമായി സ്മാരക സംരക്ഷണം.

നിലവിലുള്ള കേന്ദ്ര നിയമങ്ങൾ

• Ancient Monuments and Archaeological Sites and Remains Act, 1958 (AMASR) – സ്പർശ്യ പൈതൃക സംരക്ഷണത്തിനായുള്ള പ്രാഥമിക നിയമം.

• Antiquities and Art Treasures Act, 1972 – പുരാവസ്തുക്കളുടെ കയറ്റുമതിയും വിൽപനയും നിയന്ത്രിക്കുന്നു.

വെല്ലുവിളികൾ

ദേശീയതലത്തിലുള്ള വിശകലനം

• ആർക്കിയോളജിക്കൽ സർവേ ഓഫ് ഇന്ത്യ (ASI) യുടെ സംരക്ഷണത്തിലുള്ള സ്മാരകങ്ങളോ സ്ഥലങ്ങളോ ഉപകരണങ്ങളോ കൃത്യമായി രേഖപ്പെടുത്തിയിട്ടില്ല.

• സംരക്ഷിത സ്മാരകങ്ങൾ തന്നെ പലതും പ്രകൃതി ക്ഷോഭങ്ങൾ, അണക്കെട്ടുകൾ, കയ്യേറ്റം തുടങ്ങിയ വിവിധ കാരണങ്ങളാൽ നശിച്ചു പോയി.

• ഉള്ള സ്മാരകങ്ങൾ സംരക്ഷിക്കുന്നതിൽ സുരക്ഷാ ജീവനക്കാരുടെയും സാമ്പത്തിക വിഭവങ്ങളുടെയും കുറവ്.

• അസ്പർശ്യ പൈതൃകത്തിനുള്ള (Intangible Heritage) നിയമരൂപത്തിലുള്ള സംരക്ഷണത്തിലൊഴിഞ്ഞ്, പദ്ധതി അടിസ്ഥാനത്തിലുള്ള പിന്തുണ മാത്രം.

കേരളത്തിലെ സ്ഥിതി നിരീക്ഷണം

• 1968-ൽ നിലവിൽ വന്ന സംസ്ഥാന പൈതൃക സംരക്ഷണ നിയമം പല ഭാഗത്തും ഫലപ്രദമല്ല.

• വിവിധ വകുപ്പുകൾ നിലവിലുണ്ടെങ്കിലും സംരക്ഷണം പരിമിതമാണ്.

• താളിയോലകൾ, ഭൂമി, ജൈവ വൈവിധ്യങ്ങൾ, നാട്ടറിവ്, അഗ്രഹാരങ്ങൾ തുടങ്ങിയവ നഷ്ടമായി പോകുന്നു.

• വിദേശത്ത് അനധികൃതമായി കയറ്റുമതി ചെയ്യുന്ന പൈതൃക വസ്തുക്കളെ കുറിച്ചും കർശന ഇടപെടൽ ആവശ്യമുണ്ട്.